| د. سعيد فهمي * |
زمان قالوا أسمع كلامك أصدقك أشوف أمورك أستعجب وسبحانه هو العليم بالقلوب والنفوس.. الميدان ما شاء الله مليان وجوه كتير اللي وطني واللي غاوي شُهرة واللي نسي ثوريته في الميدان واللي عاوز يبقى زعيم واللي عاوز يلطشها وهو في الأصل عليها جاسوس.. واللي كان مهضوم حقه واللي عارف بس مش فاهم واللي لا عارف ولا فاهم اللي بيحصل إيه حاجة كدة زي التيوس.. وناس ماسكة يُفط وناس رافعة شعارات وهي مش فاهماها وتقول لا للإعلان فوق الدستوري وهو مش فاهم الفرق بين سيد قشطة والجاموس.. فينك ياعم نجيب الله يرحم أيامك لو كنت عايش اليومين دول كنت حتشوف بانوراما ودراما في الميدان فشر بين القصرين وقصر الشوق لأن السيناريو هناك محبوك ومدروس.. سيناريو الميدان دراما عالمية فيها البطل وفيها شجيع السيما والسنيورة أم صوت عالي وعم عبد السلام الغلبان وشلاطة صاحب المولوتوف اللي عالميدان مدسوس.. ياخسارة عليك يا زمن لما المصري يموت بسلاح أخوه ده بمولوتوف وده بخرطوش وده بقنابل غاز وكأنها حرب الرومان والمجوس.. يا عيني عليكي يا بلد لما ولادك يتناحروا على مغانمك والعدو على كل لون ونوع حوالين السور متربص ومرصوص.. اللي بيحصل في الميدان وصراع السُلطة الوهمي سيناريو سابق التجهيز ومعلوم ومدروس.. الضرب تحت الحزام بقى عالمكشوف واللي تكسب به العب به وتحت شعار مبادئ إخوانجية أو سلفية أو علمانية وليبرالية أو فلول والكل جاهز بالنفوذ والألاعيب وزكايب الفلوس.. مش عارف ليه حالة الهياج والفوقان المفاجئ وكرسي في الكلوب وخليها ضلمة رغم إن النفق أخره فيه شمعة بس جوه فانوس.. لكن إن شاء الله كل السيناريوهات بإذن الله مردودة ومقدور عليها بوعي الناس ولأن الوطن ده ببساطة مُصان من الرحمن ومحروس..!!
الدنيا ظاطت وباظت وكل من هب ودب قاعد يعطي أوامر وتوصيات للعسكر بترك المسؤولية وكأن سيادته عن البلد مسؤول.. مين قال إن الثورة في الميدان بس والناس محروقة من البطالة والتهاب الأسعار واقتصاد متهاوي ووصف أي رأى معارض بالفلول.. يا ترى مين اللي ولع الميدان وبيروح في الليل يعمل اتفاق تاني ويزايد على وطنية الناس وكأنه من أحفاد عبد الله بن سلول.. مين اللي قاعد يقود الأوركسترا وبيوزع اللحن ده يطبل وده يزمر وده قاعد يدندن على الأرغول.. ده مصير بلد يا خلق هووه مش سفسطة وهلفطة وشعارات وسيناريوهات وكل من هب ودب قاعد يفتي ويقول.. بالذمة اللي جاي وبيطالب بالتغيير في وسط الطريق وعاوز يشيل ده ويجيب ده يبقى عاقل وللا مخبول.. مين اللي عاوز يخلينا محلك سر ومين اللي طلع طبل وزمر ونادى بحياه العسكر وفجأه لقينا لسانه فالت وقلبه من العسكر مغلول.. روح شوف الميدان ولاحظ اللي بتلهب حماس الشباب وتحفزهم على مهاجمة الشرطة والعسكر بمنتهى الحرفية بكلام بذئ غير مسؤول.. روح وشوف القبضاي اللي بيوزع الولاد الصغيرين يشتم هنا ويضرب هناك وتلاقيه بياخد إتاوه من بياعين الشاي والكشري عيني عينك وعاوز الأزمة تطول.. عيب قوي تعمل فيها ثورجي وزعيم وإنت من غير طعم ولون ومصنف بين الناس دلدول.. عيب قوي نسيب ناس فرحانة بطلبات أميركية وغربية بتسليم السلطة في التو واللحظة بمنتهى الصفاقة وعمالة تبلبط في الفضائيات بسمومها وقاعدة تصول وتجول.. المشكلة مش في حكم العسكر المشكلة إنهم خلاص إنكشفوا وقاعدين مستنيين توزيع المحصول.. خليهم يلعبوا ويمرحوا لكن يا ناس اللعب مش في مصير بلد ولا تخوين لحماه وطن رغم بطء الأداء وخدوا بالكم من أفعالكم لأن كل شيء مُسجل في الكشكول.. فيه ناس محتاجة تفهم وفيه ناس فاكرة إن الشجاعة مجرد حديث في فضائية أو إشتراك في مظاهرة أو إن شرف الوطنية مجرد جرعة جفاف ممكن يبلعوها في محلول..!!
الحالم بحجز العسكر في المعسكر واهم وغلبان ومسكين.. نازل الميدان زي البغبغان وبيردد كلام محفوظ متلقن بأجندة من ناس محترفين.. تقدر تقول لي إيه اللي لم تنتن على تنتون واللي بيعارض وثيقة السلمي أو إدارة العسكر يبقوا مين.. تقدر تقول وبكل أمانة وضمير البديل الموازي ومين اللي يقدر يحفظ أمن المصريين.. العسكر مش ملايكة لكن إن كان الكل وحش فهو أحسن الوحشين.. قبل ماتشوف نص الكوب الفاضي شوف النص المليان وشوف مين اللي محافظ على شعرة معاوية وعلى بواقي الأمن في نفوس المواطنين.. إرضاء كل الناس غاية لا تدرك وصعب تحقق أماني الناس والملايين.. ناس تقول انتخابات وناس مش عاوزاها وعيون قاعدة مستنية فوضى منظمة وفي خراب البلد عشمانين.. الناس من كتر اللي شافوه من ناس منهم غيروا وبدلوا مواقفهم بقوا من وعود العسكر قلقانين.. العيب فيكم مش في العسكر لأن الناس دي حافظت عليك وعلى بلدك سنين وسنين.. الاعتراض على سياسة العسكر شئ طبيعي وومسموح لكن الغير مسموح إهانة الرموز العسكرية الوطنية من أي جهه مهما كانت مين.. الكلام ده مش دفاع عن العسكر لكن دي كلمة حق لأن إحنا شعب أصيل بيحفظ الجميل ولازم نكون للي حمى ثورتنا بعد الله شاكرين.. مصر كلها هي معسكر العسكر وهم حماة الوطن وهم العين السهرانة واللي للوطن حافظين.. أدي الانتخابات ماشية بفضل الله ثم الجيش زي الفل والساحة بقت جاهزة للفعل مش للسفسطة والهواة والمراهقين.. أدي البلد في طريقها لاستلام أول برلمان حر بعد طول انتظار ياريت نشوف بقى همة السادة اللي عاملين فيها وطنيين.. كل مظاهرة وأنتم بخير وكل إنتخابات حرة وأنتم طيبين.. السادة دعاة الوطنية أدي برلمان حر وقريبا رئيس منتخب والكرة دلوقتي في ملعبكم وأدينا قاعدين فماذا أنتم فاعلين..!!!
[email protected]