كويتيات - أهازيج الطفولة (2 من 5)

أبوي العود قاللي
الكويت راح تعللي... تعللي... وتعللي
ويا سامع صلي وعلى النبي صلي
أبوي العود قاللي
يا ولدي دير بالك
ترى الكويت
بيتك وبيت عيالك
جدم وانطح فالك
أبوي العود قاللي
بفيلجا يدي وبمسجان يد يدي
وأم النمل فيها حظرتنا والمردي
أبوي العود قاللي
حظرتنا يا ولدي
عالسيف فرشناها
بخبرتنا هندزناها
وعدال الامريكاني نصبناها
قيس سرها اباعين
وخل نظرتك بالعين
وزيد باع تدويح
والبحر لك رزق وترويح
وبالسجيج اربط بابه
وتهنى بالسمج
واشكر وحمد من جابه
أبوي العود قاللي
شوف الحسبة يا ولدي
ومن حسبة الحسبة تعدي
يا ولدي قيس السج بالوللي
اثنعش باع مرهونه
وباعين من عندك ميمونه
دوّح الحوش اباعين
وخلك راهي في الحالتين
 أبوي العود قاللي
الولالي جابلها
ترى نصبة الحظور لاهلها
(ولو كلمن يه ونجر ما ظل بالوادي شجر)
وآمن يا ولدي بالقدر
وربك الرحمن ما ينسى البشر
أبوي العود قاللي
باب الحظرة مفتوح
والرزق لي يه ما يروح
بس يبي حمد وشكر
والصبر يا ولدي الصبر
أبوي العود قاللي
من دون إيد
الحظرة ما تصيد
(وإيد وحدة ما تصفق)
كل إيد فوقها إيد
وإيد الله تزيد الخير وتزيد
أبوي العود قاللي..يا ولدي
موكل أحبالك مشدوده
ولا كل مراديك ممدوده
ترى دنياك تاخذ وتعيد
والقديم يا ولدي
أساس اليديد
أبوي العود قاللي
خل المشدود والممدود
في سرها وحوشها وبرها
والإيد خلها مسامحه
واردم حظرتك يا ولدي
واكتب ودون .. ومثل ما قالوا
(حرص ولا تخون)
خذ يلتك والمسلات
ومن الله خذ البركات
أبوي العود قاللي... يا ولدي
صيد السمج مهنتنا
وعلى الصبر ربتنا
وهذا رزقنا وهذي قسمتنا
نحمد الله ونشكره
بركعتنا وسجدتنا
وبقومتنا وبقعدتنا
ونبينا محمد نذكره
بالصلاة والسلام
كل ما طره
أبوي العود قاللي
الكويت راح تعللي... تعللي... وتعللي
ويا سامع صلي وعلى النبي صلي
* كاتب وباحث لغوي كويتي
- أهازيج وطنية تنشر بمناسبة قرب الاحتفال بأعياد الكويت.
fahd61rashed@hotmail.com