أن نواف

يالشعر وش باقي بعد موت نواف

الشاعر اللي جاد فن الجزاله

يوم أن بعض الناس غدران وطفاف

هو البحر واسع عميق مجاله

في باطنه لؤلؤ ومرجان ينشاف

من كثر خيرة واصلن حد جاله

بالنظم ما تلقى من ابياته اخفاف

قصايده تظهر بلاغة مقاله

وبالقلطة ابداعه بمعناه ينضاف

لا واجه الشعار زان ارتجاله

كم شاعرن عانده ثم شاف ما عاف

تيار جارف من مشي عكس شاله

وانا اشهد ان نواف ما هو بخواف

شجاعته تظهر بوقت انفعاله

يرمي ورمياته يصيبن الأهداف

يسهل عليه الصعب لا من نواله

لو نمدحه ما يعطي المدح الانصاف

كل المدايح تبدي الانحناله

هذا وهو طيب ومن نسل الاشراف

اهل الكرم والجود وأهل الشكاله

عوازم تمشي على حسب الأعراف

يا حظ من تفزع سلايل عطاله

واليوم دمعي مسرف بعيني اسراف

ومالوم عين تنثر دموعها له

ويا قبر انا بوصيك لتصير له جاف

عساه يثبت عند اجابة سؤاله

ومرحوم يا سيف عن آلاف الاسياف

عسى الجنان اتفتح ابوابها له

يا جعل له فيها مشتى ومصياف

يرضى عليه الله ويطيب فاله