احتريتك عمر
يوم عدت رحلتك جيت بسلام
ودك من سنين همك تستريح
جيتني تنثر مشاريه وملام
وترتكب قدامي العذر القبيح
جيت تفرد لي ضلوعك باهتمام
تحتري صدر يضمك ما يشيح
جيتني وأنا بفضل الله تمام
التجي له من فم الدهر الشحيح
كل ما وقتي معي شد الحزام
قلت ياربي وكون الله فسيح
إيه ماضد الزمن غير الكرام!
ايه ماضم الدجى غير الفحيح!!
كل ماخلق الله انكبوا نيام
قمت اجر الصوت من غلي واصيح
وكل ما عيني رأت سرب الحمام
قلت واعزاه ودموعي تسيح
احتريتك عمر... وسيوف الكلام
كل شخص سلها لي مستبيح
جالهم حولي من الكره احتدام
وصرت بين يدينهم طير ذبيح
وبين قلبك وين يا عال المقام؟!
ما احتماني يوم طحت اعن المطيح
ما رحم ضعفي ولا لين العظام
ولا فزع يزما من الحمل ويزيح
لا تقول انك تكبدت الجهام
وانك بفرقاي من شوقك طريح
لا تصب العذر في كاس حطام
ما يسد العذر لو منه يفيح
ما بقى في عيني ايات احترام
للوعود اللي غدت شيح بريح
افتقدتك ايه... لكن الظلام
شيد لبيض النوايا بي ضريح
هاك سلسال المحبة والغرام
وروح بفالك عسا دربك سميح
عن دروبك عز خفاقي وشام
حره بقلبي وكون الله فسيح
