الشوق ذباح

الشوق ذباح شعور غير واحاسيس يتخللها البرود ويفجر الغياب بهذا النص تصافحكم نورة.



بصْدِقِك بحكاي وإحساسي غزير 

ما يهم الوزن و لاّ القافيه

طبعك اللي من عشقتك صار غير

أثبت إن رحمة شعورك غافيه

يومي بقلبك شعرت إنه صغير

بارد إحساسك ويدينك دافيه

لين رِحت وفجّر غيابي غدير

من مشاعر في حضوري طافيه

لا تعاتب وأنت فِشعوري خبير

قلت فارقني بـ نيّة صافيه

أدري إن الشوق ذبَّاح وعسير

لكن أعذاري سمان وكافيه

لذَة وصالك تخالط طعِم كير

ضيقتي ويّاك عقبك ضافيه

راحتي فبُعدك ولوّ ماني بخير

لأنها عيوني لزولك وافيه

ولو ترّفعنا عن الذنب الكبير

تبطي جروحي مهي متشافيه

حتى لو يرضى عليّ صوت الضمير

(جاتِك أشواقي جياع وحافيه )

با طلبك حاجة عساها مو كثير

اعتق إحساسي يا مال العافيه



شعر: نورة البرقاوي