رحلة

نص هادف وموعظة لكل متعظ... صاغ ابيات هذا النص شاعر يمتاز بقوة المفردة، انه نهار بن ممدوح فله كل الشكر على هذه الموعظة...

يا الله ياللي تعلم السرالدفين
اللي يتصدّد منْه حتى قايله
يا رب تهديني وبالحبل المتين
جوّد إيديني عن سموم القايله
وتعيذني من عرضه ابليس اللعين
اللي لخلقك ناصبٍ حبايله
وإنك توفقني ولأحوالي تعين
أنت الذي لا ضقت قمت أخايله
لا ضاعت الحيله عليّه يا معين
ما غيرك أحد بالوجود أسايله
مالي غنى عنّك وضعفي مستكين
وانت الجدير اللي يبث شكاي له
مرات أحس إني بهالدينا حزين
ويضيق صدري لين أصبّ بكاي له
وتاخذني الذكرى ونسمات الحنين
للي غدت دنياه في رحايله
أبوي وأصحابي وكل المسلمين
ومن كان قبره صفّقت نثايله
هنا عرفت إن الأجل لازم يحين
وإن البقى للي علي فضايله
ولو هي تدوم إن كان دامت للذهين
اللي يمرر بالخفى عمايله
لكنها فيّة عصر للمبصرين
اللي لهم بالعلم قوه هايله
والهقوه اللّي ما يلقّحها الفطين
تبقى على طول المسافة حايله
حاولت أزينها وعيّت لا تزين
والوقت عمره ما يعدل المايله
والصاحب اللي لا بغيته ما يبين
وليا زهمته قافلٍ موبايله
هذاك خله لا يسار ولا يمين
وكبّه إذا إنك للشدايد شايله
ويالعبد مالك غير صوم وركعتين
وإلا ترى الدنيا حياةٍ زايله
ومالك عن اللي منكتب لك بالجبين
واللي مهو مكتوب منت بنايله
والعمر رحله والمسافات السنين
والعبد موته لو يعمّر جايله
مير اعبد الله لين يأتيك اليقين
وشيٍ مهو مكتوب منت بطايله

| نهار بن ممدوح |